Адзін з самых чытаных сучасных беларускіх пісьменнікаў, цяпер яшчэ і “пісьменнік лістоў” ды “пісьменнік для дыпламатаў”… Мы размаўляем з Сашам Філіпенкам увечары. Сям’я чакае яго на вячэру, за кадрам перыядычна ўзнікае голас сына, у той жа час удакладняюцца дэталі чарговай сустрэчы. Пасля кнігі “Крэмулятар” пісьменнік сканцэнтраваўся на размовах з дыпламатамі, лістах і інтэрв’ю – усім, дзе можа расказаць у тым ліку (а можа, і перадусім) пра Беларусь. Між іншым жартуе, што ўсё роўна ядравая вайна хутка ўсё знішчыць. І я пытаюся, якая сёння ўвогуле імавернасць ядравай вайны.