Вырасла пакаленне ў вычварнай, перакуленай рэальнасці. Напрыклад, еду, бачу плакат “Мы выбираем Беларусь”. І вось у іх такая Беларусь – спрэс расійскамоўная. Што яны абіраюць? Універмаг “Беларусь” ці трактар “Беларусь”? У народжаных за часоў Лукашэнкі няма перад вачыма беларускай Беларусі. Гэта так проста за пару месяцаў не выправіш.
Цяпер мы ў стадыі глабальнай лінькі. Мы закутыя ў мёртвую скуру, якая труціць нас. Але арганізм вызваляецца ад гэтага мёртвага на целе (грамадства). Але гэтай скуры шмат, таму ты не можаш гвалтоўна паскорыць працэс вызвалення ад мярцвячыны. Інакш атрымліваецца самагубства. Таму трэба набрацца цярпення і трываць. За гэты нявызначаны час мы атруцімся, а пасля гэтая атрута выйдзе з нас. Я не ведаю, наколькі тоўстая тая скура, таму цяжка сказаць, колькі часу будзем ад яе вызваляцца.
У Еўропу я не веру, гэта х@ня, можаш так і напісаць (маецца на ўвазе Заходняя Еўропа. – Заўвага рэд.). Я веру ў былую Рэч Паспалітую – Польшча, Літва, Украіна, а таксама Латвія ды Эстонія. Гэтыя краіны нам дапамагаюць. А Расія ў прынцыпе не можа дапамагчы, бо ў іх у галаве не ўкладаецца, як можна дапамагаць людзям. Яны дапамагаюць толькі хану.
Я адразу сказаў, што змена ўлады не можа быць хуткай, гэта будзе марафон, гэты працэс будзе вельмі балючым, сінія пальцы сыходзіць не плануюць. Што да расколу элітаў, бяда ў тым, што элітаў няма. Былі б – штосьці б запрацавала. Хоць заявы пра калектыўнага Лукашэнку не проста так. Значыць, усё сыплецца.